പുസ്തകം എന്ന ലേബല്‍ ഉള്ള പോസ്റ്റുകള്‍ കാണിക്കുന്നു. എല്ലാ പോസ്റ്റുകളും കാണിക്കൂ
പുസ്തകം എന്ന ലേബല്‍ ഉള്ള പോസ്റ്റുകള്‍ കാണിക്കുന്നു. എല്ലാ പോസ്റ്റുകളും കാണിക്കൂ

2015 സെപ്റ്റംബർ 7, തിങ്കളാഴ്‌ച

ദി സ്ട്രെയിൻജർ (The Stranger)

കാല-ദേശ പരിമിതികളെ അതിക്രമിച്ചു നില്ക്കുന്ന സാഹിത്യത്തെയാണ്‌ നാം വിശ്വ സാഹിത്യം എന്നു പറയുന്നത്.നോബൽ സമ്മാനജേതാവായ ആൽബേർട്ട് കമു -വിന്റെ (Albert Camus)  "ദി സ്ട്രെയിൻജർ"  (The Stranger) എന്ന പുസ്തകം ഈ ഗണത്തിൽപ്പെടുന്ന ഒന്നാണ് . രണ്ടാം ലോക മഹായുദ്ധത്തിൽ , ജെർമിൻ അധിനിവേശത്തിലകപ്പെട്ട  ഫ്രാൻസിൽ വച്ച് ,1942 -ൽ എഴുതപ്പെട്ട ഈ നോവൽ, ലോകത്തിന്റെ മുഴുവൻ ശ്രദ്ധയും വളരെ വേഗം പിടിച്ചുപറ്റി. കൃതിയുടെ പഴക്കവും നോബൽ സമ്മാന ജേതാവ് എന്ന മുഖവുരയും, ഒരു ബോറൻ  ധാരണയുണ്ടാക്കുന്നുവെങ്കിലും  കേവലം നൂറു പേജിനോടടുത്ത് മാത്രം വലിപ്പമുള്ള , വളരെവേഗം വായിച്ചു പോകാൻ കഴിയുന്ന  ഒരു ചെറിയ പുസ്തകമാണിത് .
 
മ്യുർസൗ(Meursault)എന്ന കഥാനായകൻ സ്വയം വിവരണം നടത്തുന്ന രീതിയിൽ ക്രമീകരിച്ചിട്ടുള്ള ഇതിന്റെ കഥ , ലോകത്തിന്റെ ഏതു കോണിലിരുന്ന്, ഏതു കാലഘട്ടത്തിൽ വായിച്ചാലും വായനക്കാരനെ സ്പർശിക്കുന്ന ഒന്നാണ് . പ്രായമായ അമ്മ മരിച്ചു എന്ന് വൃദ്ധ സദനത്തിൽ നിന്ന്  ടെലിഗ്രാം വരുന്നതോടെയാണ് കഥ ആരംഭിക്കുനത്. ജോലി സ്ഥലത്ത് നിന്ന് ഒരു വിധത്തിൽ അവധി തരപ്പെടുത്തി അയാൾ നാട്ടിൽ എത്തുന്നു. അമ്മയുമായി അത്ര വലിയ ആത്മബന്ധം ഒന്നുമില്ലായിരുന്ന അയ്യാൾ, മൃത ശരീരം ഒന്ന് കാണുവാൻ പോലും താത്പര്യം പ്രകടിപ്പിക്കുന്നില്ല. കാപ്പി കുടിച്ചും സിഗരറ്റ് വലിച്ചും രാത്രി തള്ളി നീക്കുന്ന മ്യുർസൗ നെ ആശ്വസിപ്പിക്കുവാൻ വൃദ്ധ സദനത്തിന്റെ ഡയറക്ടർ ഉൾപെടെ ആളുകൾ നടത്തുന്ന ശ്രമങ്ങൾ എല്ലാം അയാളെ കൂടുതൽ അലോസരപ്പെടുത്തുന്നു.മ്യുർസൗ പ്രകടിപ്പിക്കുന്ന ഈ നിസംഗത എല്ലാവരെയും അന്പരപ്പിക്കുന്നു. പിറ്റേദിവസം യാന്തികമായ ഫ്യുണറലിനു ശേഷം ജോലി സ്ഥലത്തേക്ക് മടങ്ങുന്നു.

2015 ഓഗസ്റ്റ് 7, വെള്ളിയാഴ്‌ച

കോസ്മോസ്

  'പോപ്പുലർ സയൻസ്' വിഭാഗത്തിൽ - വിശേഷിച്ചും അമേരിക്കയിൽ - ഏറെ ജനശ്രദ്ധ നേടിയ ഒരു പുസ്തകമാണ്  "കോസ്മോസ്". അമേരിക്കൻ ടെലിവിഷൻ രംഗത്തെ എക്കാലത്തെയും ജന പ്രിയ പ്രോഗ്രാമുകളിൽ ഒന്നായ കോസ്മോസ്: എ പേർസണൽ വോയേജ് ( Cosmos: A Personal Voyage) എന്ന പരന്പരയുടെ പുസ്തകാവിഷ്കാരമാണ്  ഇത്.ബഹിരാകാശ ഗവേഷണം അതിന്റെ ശൈശവ ദശയിൽ ആയിരുന്ന 1980 കളിൽ പുറത്തിറങ്ങിയ ഈ പുസ്തകവും ടെലിവിഷൻ പരന്പരയും,  തലമുറകളെ സ്വാധീനിച്ചു എന്നു പറഞ്ഞാൽ ഒട്ടും അതിശയോക്തിയാവില്ല. ഇവയുടെ സ്വാധീനം കൊണ്ട് മാത്രം ശാസ്ത്ര ഗവേഷണ രംഗങ്ങളിൽ എത്തിപ്പെട്ട് കഴിവ് തെളിയിച്ച ഒട്ടേറെ പേർ ഇവിടങ്ങളിലുണ്ട് .അമേരിക്കൻ ബഹിരാകാശ ശാസ്ത്രകാരനായിരുന്ന കാൾ സാഗൻ(Carl Sagan) ആയിരുന്നു ഈ രണ്ടു സംരഭങ്ങളുടെയും സൂത്രധാരൻ.  ശാസ്ത്ര വിഷയങ്ങളെ, സാധാരണ ജനങ്ങൾക്ക് , മനസിലാകുന്ന വിധത്തിൽ, ലളിതമായും സരസമായും അവതരിപ്പിക്കുന്നതിൽ സാഗനുള്ള കഴിവ് ഈ പുസ്തകം വിളിച്ചോതുന്നു. വിഖ്യാതമായ പുലിറ്റ്സെർ പ്രൈസ് അദ്ദേഹത്തെ തേടിയെത്തിയതിന്റെ  കാരണവും മറ്റൊന്നല്ല. ടെലിവിഷൻ പോലെ ഒരു മാധ്യമത്തെ കേവലം വിനോദത്തിനു മാത്രമല്ല , വിദ്യാഭ്യാസപരമായ കാര്യങ്ങൾക്ക് കൂടി ഉപയോഗിക്കാം എന്നുള്ള  അദ്ദേഹത്തിന്റെ  ദീർഘ വീക്ഷണം ഏറെ പ്രശംസനീയമാണ് .

ഒരു ടെലിവിഷൻ പരന്പരയുടെ മാതൃകയിൽ പതിമൂന്ന്‌ അദ്ധ്യായങ്ങൾ ആണ് ഈ പുസ്തകത്തിനുള്ളത് . പറയുവാൻ പോകുന്ന വിഷയത്തെ ആസ്വദിക്കുവാൻ നമ്മുടെ മനസിനെ കൂടുതൽ പാകമാക്കുന്ന വിധത്തിലാണ് ഓരോ അധ്യായങ്ങളുടെ പേരും, തുടക്കത്തിൽ ഉൾപ്പെടുത്തിയിരിക്കുന്ന പ്രസിദ്ധമായ ചില മഹദ് വചനങ്ങളും. ആരംഭം മുതൽ അവസാനം വരെ വളരെ കാവ്യാത്മകമായ ഒരു ശൈലിയിൽ ആണ് ഈ പുസ്തകം പുരോഗമിക്കുന്നത് .

2015 ജൂൺ 5, വെള്ളിയാഴ്‌ച

പ്ലേയിംഗ് ഇറ്റ്‌ മൈ വേ (സച്ചിൻ തെണ്ടുൽക്കറുടെ ആത്മകഥ)

വലിയ പ്രതീക്ഷയോടെയാണ്  സച്ചിൻ തെണ്ടുൽക്കറുടെ ആത്മകഥയായ  "പ്ലേയിംഗ്  ഇറ്റ്‌ മൈ വേ" (Playing It My Way)വായനയ്ക്ക് എടുത്തത്. ഇരുപത്തിയഞ്ച് വർഷത്തോളം ഇന്ത്യൻ ക്രിക്കറ്റിന്റെ എല്ലാമെല്ലാമായിരുന്ന സച്ചിന്റെ ജീവിതത്തെ കുറിച്ച് കൂടുതൽ  അറിയുവാൻ, ആ കാലഘട്ടത്തിൽ ജീവിച്ച ഏതൊരാൾക്കും താല്പര്യം തോന്നുന്നത് സ്വാഭാവികം . ഈ ആവേശങ്ങളെയൊക്കെ തല്ലിക്കെടുത്തുന്ന ഒന്നാണ് ഈ പുസ്തകം എന്ന് പറയാതെ നിവൃത്തിയില്ല. വായന യുടെ ഒരു വേളയിലും, ഒരു തരത്തിലുള്ള സംതൃപ്തിയും ഈ പുസ്തകം പ്രദാനം ചെയ്യുന്നില്ല. ബോറിയ മജുംദാർ (Boria Majumdar) എന്ന പത്ര പ്രവർത്തകനാണ് സച്ചിനെ ഇത് തയ്യാറാക്കാൻ സഹായിച്ചിരിക്കുന്നത് . ഇന്ത്യൻ ക്രിക്കറ്റ്ന്റെ സാമൂഹിക ചരിത്രത്തിൽ ഡോക്ട്രേറ്റ് ഉള്ള അദ്ദേഹം ഒരു പ്രബന്ധം തയ്യാറാക്കുന്ന രീതിയിൽ ആണ് ഇതിനെ സമീപിച്ചിരിക്കുന്നത്.

 സച്ചിന്റെ ജീവിതത്തിലെ  മുഹൂർത്തങ്ങളെ അവലംബിച്ച്   വായനയ്ക്ക് -രസകരമായ രീതിയിൽ- പുതിയ മാനങ്ങൾ നല്കുവാൻ  പുസ്തകം ശ്രമിക്കുന്നതേയില്ല .സച്ചിന്റെ ജീവിതത്തിലേക്ക് എത്തി നോക്കുന്ന  സന്ദർഭങ്ങളെപോലും വളരെ നിർജ്ജീവമായ രീതിയിലാണ് അവതരിപ്പിച്ചിരിക്കുന്നത്. വായന തുടരുന്നതിനുതകുന്ന " താല്പര്യം"  ജനിപ്പിക്കുന്നതിൽ പുസ്തകം പരാജയപ്പെടുന്നു.സച്ചിന്റെ കരിയറിലെ ഓരോ മത്സരത്തെയും , വളരെ സൂക്ഷമായി ഈ പുസ്തകം വിശദീകരിക്കുന്നു (പലപ്പോഴും ആവശ്യത്തിലേറെ) . ചുരുക്കത്തിൽ സച്ചിൻ പങ്കെടുത്ത കളികളുടെ പത്ര റിപ്പോർട്ടുകൾ ഒരുമിച്ചു ചേർത്തുവച്ച്  വായിക്കുന്ന ഒരു പ്രതീതിയാണ് വായനയുടെ 90 ശതമാനവും നമുക്ക് അനുഭവപ്പെടുന്നത് . പുസ്തകത്തിലുടനീളം നിറഞ്ഞു നില്ക്കുന്ന "ഞാൻ" പ്രയോഗവും  ആവശ്യത്തിനും അനാവശ്യത്തിനും ഭാര്യയായ  അഞ്ജലിയുടെ 'സ്വാധീനം' പരാമർശിക്കുന്ന രീതിയും വായനക്കാരനിൽ ചെലുത്തുന്ന അലോസരം ചെറുതൊന്നുമല്ല .

2015 മേയ് 16, ശനിയാഴ്‌ച

ബോധത്തിന്റെ ഉള്ളറകൾ തേടി... (Shadows of the Mind)

എബ്രഹാം ലിങ്കണ്‍-ന്റെ ഇടതു കാൽ വാഷിംഗ്ടണ്‍ ഡി സി യിൽ ആയിരിക്കുന്പോൾ വലതു കാൽ എവിടെ ആയിരിക്കും?  ഒന്ന് ചിന്തിക്കുക പോലും ചെയ്യാതെ , ഞൊടിയിടയിൽ നിങ്ങൾ ഉത്തരം കണ്ടെത്തിക്കാണുമെന്നുറപ്പ് . എന്നാൽ അത്യാധുനീക സൂപ്പർ കന്പ്യൂട്ടറുകൾ ഈ ചോദ്യത്തിന് ഉത്തരം കണ്ടെത്തുവാൻ ചിലപ്പോൾ മണിക്കൂറുകൾ ചിലവഴിച്ചേക്കാം എന്ന് പറയുന്പോൾ, ഒരു പക്ഷെ നമ്മൾ അല്പം സംശയിച്ചേക്കാം . കണക്കുകൾ കൂട്ടുന്ന വേഗതയിലും , സങ്കീർണമായവ കൃത്യതയോടെ ചെയ്യുന്ന കാര്യത്തിലും , ഓർമ്മ ശക്തിയിലും കന്പ്യൂട്ടറുകൾ മനുഷ്യനെക്കാൾ കേമന്മാരാണ്.ചെസ്സ്‌ പോലെ , ബുദ്ധി ഉപയോഗിക്കേണ്ടുന്ന കളികളിലും ഓർമ്മ ശക്തിയോടൊപ്പം , മനസ്സാന്നിദ്ധ്യവും (Presence of mind) പരീക്ഷിക്കപ്പെടുന്ന  ജെപർഡി (Jeopardy) പോലുള്ള ഗെയിം ഷോ കളിലും കന്പ്യൂട്ടറുകൾ മനുഷ്യനുമേൽ വിജയം നേടി കഴിഞ്ഞിരിക്കുന്നു . എന്നിരുന്നാലും നമ്മുടെ ചിന്താശേഷി ഉപഗോഗിച്ച്, അനായാസേന, കണ്ടെത്താൻ കഴിയുന്ന പല ചോദ്യങ്ങളും കന്പ്യൂട്ടറുകൾക്ക് ഇന്നും കീറാമുട്ടിയാണ് .   

ഇവിടെ ബുദ്ധി ,എന്ന് സാമാന്യമായി നാം വിവക്ഷിക്കുന്ന ഗുണത്തെ കുറച്ചു കൂടി സൂക്ഷമായി മനസിലാക്കേണ്ടതുണ്ട് . വേഗത്തിൽ കണക്കുകൂട്ടാനുള്ള കഴിവിനെയും, ഓർമ്മ ശക്തിയെയും, കാര്യങ്ങൾ പെട്ടന്ന് ഗ്രഹിച്ചു ഉചിതമായ തീരുമാനത്തിലെത്തുവാനുള്ള കഴിവിനെയും ഒക്കെ ചേർത്താണ് നാം ബുദ്ധി എന്ന് സാമാന്യമായി  പറയുന്നത്.ഇവയിൽ ആദ്യം പറഞ്ഞ രണ്ടു ഗുണങ്ങൾ കന്പ്യൂട്ടറുകൾക്ക് ഒരു ശരാശരി മനുഷ്യനെക്കാൾ കൂടുതൽ ഉണ്ട് എന്ന കാര്യത്തിൽ ഒരു തർക്കവുമില്ല . എന്നാൽ മൂന്നാമത്തെ ഗുണമാകട്ടെ കന്പ്യൂട്ടറുകൾക്ക് തീരെയില്ലതാനും. എന്തായിരിക്കാം ഇതിനു കാരണം ? മനുഷ്യന്റെ ചിന്താശേഷി അതേപടിയുള്ള കന്പ്യൂട്ടറിനെ നിർമ്മിക്കുവാൻ സാധിക്കുമോ ?  ഈ ചോദ്യങ്ങളെ കൂടുതൽ ആഴത്തിൽ അന്വേക്ഷിക്കുന്ന ഒന്നാണ്  സർ റോജർ പെൻ റോസിന്റെ (Roger Penrose)   'ഷാഡോസ്  ഓഫ് ദി മൈൻഡ്' (Shadows of the Mind) എന്ന പുസ്തകം.

2014 ഡിസംബർ 31, ബുധനാഴ്‌ച

ആടുജീവിതം

സാധാരണക്കാരായ വായനക്കാരുടെ പ്രിയം ഒന്നു കൊണ്ടു മാത്രം പ്രശസ്തിയുടെ കൊടുമുടികൾ കയറിയ ഒരു നോവൽ ആണ് ബെന്യാമിന്റെ 'ആടുജീവിതം'.പുഴയില്‍നിന്ന് മണല്‍വാരി ഉപജീവനം കഴിച്ചിരുന്ന നാട്ടിന്‍പുറത്തെ നജീബ് എന്ന ചെറുപ്പക്കാരന്‍ ജീവിതത്തിൽ നേട്ടങ്ങൾ ഉണ്ടാക്കുവാൻ ആഗ്രഹിച്ച് , ഹക്കീം എന്ന സുഹൃത്തിനോടൊപ്പം, സൗദി അറേബ്യയിലേക്ക് പുറപ്പെടുന്നു. കേരളത്തിൽ നിന്ന് ഗൾഫ് രാജ്യങ്ങളിൽ പ്രവാസ ജീവിതം നയിക്കുന്ന ലക്ഷക്കണക്കിന്‌ സാധാരണക്കാരുടെ പ്രതീകമാണ് നജീബ് . ട്രാവൽ എജെന്റും മറ്റു സുഹൃത്തുകളും പറഞ്ഞിരുന്നത് പോലെ  വിസ സ്പോണ്‍സർ ചെയ്തിരുന്ന അറബി ,അല്പം വൈകി എങ്കിലും,  എയര്‍പോട്ടില്‍ നിന്നും അവരെ കൂട്ടികൊണ്ട് പോകുന്നു. അതുവരെ തികച്ചും സ്വാഭാവികമായി തോന്നുന്ന ഒരു കഥ പിന്നീട് വായനക്കാരെ അന്പരപ്പിക്കുന്ന ഒരു തലത്തിലേ ക്ക് വളരുകയാണ് ചെയ്യുന്നത്.  മരുഭൂമിക്ക് നടുവില്‍ ഏകാന്തവും വിജനവുമായ ഒരു ആടു ഫാമില്‍ എത്തിപ്പെട്ട നജീബിന്റെ തുടര്‍ന്നുള്ള ജീവിതം, നമ്മുടെ സങ്കല്‍പങ്ങള്‍ക്കപ്പുറത്തുള്ള ദൈന്യതയുടെയും പീഡയുടെയും ഏകാന്തതയുടെയും കദനകഥയാണ്. കുടിക്കുവാൻ ഒരിറ്റു വെള്ളമോ , ഒന്നു മിണ്ടുവാൻ ഒരു ജീവിയോ പോലും കൂടെയില്ലാതെയുള്ള നരകതുല്യമായ ജീവിതം. രക്ഷപെടുവാൻ അതിവിദൂരമായ ഒരു സാദ്ധ്യതപോലുമില്ലാതെ നജീബ് അവിടെ കഴിച്ചു കൂട്ടുന്ന ഓരോ നിമിഷവും വായനക്കാരായ നാം അസ്വസ്ഥരാകും എന്നു തീർച്ച. അതിനൊടുവിൽ അയാൾ അതിസാഹസികമായി രക്ഷപ്പെടുന്നു.അതിനു ശേഷമാണ് അയാൾ അറിയുന്നത് തന്നെ കൂട്ടിക്കൊണ്ടു പോയത് , തനിക്കു വിസ നല്കിയ അറബി അല്ലായിരുന്നു എന്ന സത്യം . അതോടെ നമ്മുടെ ഓരോരുത്തരുടെയും 'ജീവിതം' എന്ന ഈശ്വരന്റെ പകിടകളിയെക്കുറിച്ച് ഓരോ വായനക്കാരും ചിന്തിച്ചു പോകുമെന്നുറപ്പ്.  


2014 ഡിസംബർ 9, ചൊവ്വാഴ്ച

ദി ഫൗണ്ടന്‍ ഹെഡ്

അഹംബോധം വെടിഞ്ഞ് നിഷ്‌കാമനായി ജീവിതം നയിക്കുവാന്‍ മനുഷ്യന് സാധിക്കുമോ? മതഗ്രന്ഥങ്ങളും മഹാനുഭാവന്മാരും എല്ലാം ഒരേ സ്വരത്തോടെ ഉദ്‌ഘോഷിക്കുന്നുവെന്ന് നാം ധരിച്ചുവച്ചിരിക്കുന്ന അത്തരം 'നിസ്വാര്‍ത്ഥ ജീവിത'ങ്ങള്‍ നാം മാതൃകയാക്കണമോ? അഥവാ ഒരുവന്റെ പരമമായ ജീവിത ലക്ഷ്യം അതായിരിക്കണമോ ? മൗലികമായ ഇത്തരം ഒട്ടേറെ ചോദ്യങ്ങള്‍ വായനക്കാരില്‍ ഉണര്‍ത്തുന്ന ഒരു നോവല്‍ ആണ് അയന്‍ റാന്റെ 'ദി ഫൗണ്ടന്‍ ഹെഡ്'.

റഷ്യയില്‍ ജനിച്ചു വളര്‍ന്ന്, 1920 ലെ ബോള്‍ഷെവിക് വിപ്ലവത്തിന്റെ ദുരന്തങ്ങള്‍ നേരിട്ട് അനുഭവിച്ച അയന്‍, വ്യക്തി സ്വാതന്ത്ര്യം ഒന്നിനു വേണ്ടി മാത്രം അമേരിക്കയിലേക്ക് കുടിയേറി പ്പാര്‍ത്ത ഒരു വ്യക്തിയാണ്. സമൂഹത്തിന്റെയും ഗവണ്മെന്റിന്റെയും അനാവശ്യമായ ഇടപെടലുകള്‍ വ്യക്തിവികാസത്തെ പ്രതികൂലമായി ബാധിക്കുന്നു എന്ന നിലപാട് വിശദീകരിക്കുന്നതാണ് റാന്റിന്റെ നോവലുകളും ലേഖനങ്ങളുമെല്ലാം. ഇത്തരം ആശയങ്ങളെ പൊതുജനസമക്ഷം അവതരിപ്പിക്കുന്നതിനു തുടക്കംകുറിച്ച ഒരു നോവല്‍ ആണ് 1943 ല്‍ പുറത്തിറങ്ങിയ ദി ഫൗണ്ടന്‍ ഹെഡ്. കഥയില്‍ കഴമ്പില്ല എന്ന കാരണത്താല്‍, പത്തിലകം പ്രസാധകര്‍ നിരസിച്ച ഈ കഥ, പുറത്തിറങ്ങിയ ശേഷം ക്രമേണ ജനശ്രദ്ധ ആകര്‍ഷിക്കുകയായിരുന്നു. 


മാതൃഭൂമി ബുക്സ്  പ്രസിദ്ധീകരിച്ച ലേഖനം മുഴുവൻ വായിക്കുവാൻ ഇവിടെ ക്ലിക്ക് ചെയ്യുക

2014 ഒക്‌ടോബർ 14, ചൊവ്വാഴ്ച

ഖസാക്കിന്റെ ഇതിഹാസം

ചില പുസ്തകങ്ങൾ ആദ്യവായനയിൽ നമുക്ക് വഴങ്ങിത്തരില്ല്ല ; കുതറി മാറുന്ന ഇത്തരം പുസ്തകങ്ങളെ കീഴ്പ്പെടുത്തണമെങ്കിൽ ശ്രദ്ധയോടെയുള്ള പുനർവായന  അനിവാര്യം. ഇത്തരത്തിൽ ഒരനുഭവം സമ്മാനിച്ച  ഒന്നാണ് 'ഖസാക്കിന്റെ ഇതിഹാസം'. വർഷങ്ങൾക്ക് മുന്പ് വിരസമായിത്തോന്നി, ഒരുവിധം വായിച്ചവസാനിപ്പിച്ച ഈ പുസ്തകം വീണ്ടും വായനയ്ക്കെടുക്കുന്പോ
ൾ,  ഏറെ പ്രശംസപിടിച്ചു പറ്റിയ ഈ  നോവലിൽ എനിക്ക്  ഒരു മതിപ്പും തോന്നാതിരുന്നതെന്തേ? എന്ന ചിന്ത  മനസ്സിനെ അലോസരപ്പെടുത്തിയിരുന്നു . 'ഖസാക്കിന്റെ ഇതിഹാസം' പോലെയുള്ള ശക്തമായ ഒരു നോവൽ വായിച്ച് , കഥയിലെ ബിംബങ്ങളെ അപഗ്രഥിച്ച് , ആസ്വദിക്കണമെങ്കിൽ അല്പം 'വായനാ നിലവാരവും'  പക്വതയുമൊക്കെ ആവശ്യമാണ്‌. വായനയിലും ആസ്വാദനത്തിലും ആർജിച്ച ഈ 'പക്വത' യാകാം, വർഷങ്ങൾക്കു ശേഷമുള്ള രണ്ടാം വായനയെ കൂടുതൽ ആസ്വാദ്യകരമാക്കിയത്. നോവലിന്റെ ഘടനയെ കുറിച്ചോ എഴുത്തിന്റെ ശൈലിയെ കുറിച്ചോ ഒന്നും ആധികാരികമായി വിലയിരുത്തുവാനോ അതിനെ സംബന്ധിച്ച്  ഒരു പ്രബന്ധം അവതരിപ്പിക്കുവാനോ ഒന്നും ഇവിടെ മുതിരുന്നില്ല .തികച്ചും സാധാരണമായ ഒരു (പുനർ) വായനയിൽ  ഉളവായ ചില തോന്നലുകൾ ഇവിടെ കുറിക്കുന്നു എന്ന് മാത്രം.

2014 മേയ് 11, ഞായറാഴ്‌ച

ദി സെല്ഫിഷ് ജീന്‍

നിസ്വാര്‍ത്ഥത, അനുകമ്പ, ത്യാഗശീലം തുടങ്ങിയ ഗുണങ്ങള്‍ പ്രകൃതിയിലൂടെ സ്വാഭാവികമായി ലഭിക്കുന്ന ഒന്നാണെന്ന ധാരണ തെറ്റാണെന്നും, ബോധപൂര്‍വ്വം നാം ആ ഗുണങ്ങള്‍ വളര്‍ത്തിയെടുക്കണമെന്നും പ്രഖ്യാപിക്കുന്ന ഗ്രന്ഥമാണ് റിച്ചാര്‍ഡ് ഡോക്കിന്‍സിന്റെ 'സെല്‍ഫിഷ് ജീന്‍ '. ആ പുസ്തകം മുന്നോട്ടുവെയ്ക്കുന്ന ആശയങ്ങളെയും പ്രശ്‌നങ്ങളെയും കുറിച്ച്...


മനുഷ്യനോളം പ്രായമുള്ള ഒന്നാണ് അവന്റെ സ്വാര്‍ത്ഥത. ഒരു തരത്തിലല്ലെങ്കില്‍ മറ്റൊരു തരത്തില്‍ അതിനെക്കുറിച്ച് പരാമര്‍ശിക്കപ്പെടാതെ ഒറ്റ ദിവസവും കടന്നു പോകുന്നില്ല എന്നതാണ് വാസ്തവം.

ജീവജാലങ്ങളില്‍ മനുഷ്യന് മാത്രമാണോ സ്വാര്‍ത്ഥതയുള്ളത്? അതോ മറ്റു ജീവജാലങ്ങള്‍ക്കിടയിലും ഇതൊക്കെ പ്രകടമാണോ? സാമൂഹ്യ-ദാര്‍ശനിക തലങ്ങള്‍ക്ക് അതീതമായി ജൈവശാസ്ത്രപരമായി ഇതിന് എന്തെങ്കിലും അടിസ്ഥാനമുണ്ടോ? ജൈവികമായി മനുഷ്യന്‍ സ്വാര്‍ത്ഥനാണോ? അതോ നിഷ്‌കളങ്കനായി ജനിക്കുന്ന മനുഷ്യനെ ജീവിത സാഹചര്യങ്ങളാണോ സ്വാര്‍ത്ഥനാക്കി മാറ്റുന്നത്? 



ലേഖനം മുഴുവൻ വായിക്കുവാൻ ഇവിടെ ക്ലിക്ക് ചെയ്യുക

2014 മാർച്ച് 11, ചൊവ്വാഴ്ച

നക്ഷത്രങ്ങളെക്കുറിച്ച് ഒരല്പം ....... (Stars: A Very Short Introduction)

ചില പുസ്തകങ്ങൾ നമ്മെ തേടിയെത്തും; നാം തേടിപ്പോകുന്നവയെക്കാൾ ആസ്വാദകരമായി തോന്നുകയും ചെയ്യും!.  അത്തരം ഒരു അനുഭവം സമ്മാനിച്ച ഒരു പുസ്തകമാണ് സ്റ്റാർസ്: എ വെരി ഷോർട്ട് ഇന്റ്രോഡക്ഷൻ(Stars:A Very Short Introduction). അലസമായ ഒരു  ലൈബ്രറി യാത്രയിൽ തികച്ചും യാദൃച്ചികമായി കണ്ടത് ,താത്പര്യം തോന്നിയ മറ്റൊരു പുസ്തകവുമില്ലാത്തതിനാൽ, വെറുതെ ചെക്ക്‌ ഔട്ട്‌  ചെയ്തു അത്രമാത്രം,ആഴ്ചകൾ കഴിഞ്ഞാണ് ഇത് വായനക്കെടുത്തതുപോലും.ഓക്സ്‌ഫോർഡ് യൂണിവേർസിറ്റി പ്രസ്സിന്റെ(Oxford University Press) വെരി ഷോർട്ട് ഇന്റ്രോഡക്ഷൻസ് (Very Short Introductions)  പരന്പരയിൽപ്പെട്ട ഈ പുസ്തകം എഴുതിയത് യൂണിവേർസിറ്റി ഓഫ് ലീസെറ്റർ (University of Leicester)-ലെ തിയോററ്റിക്കൾ ആസ്ട്രോഫിസിക്സിന്റെ(Theoretical Astrophysics) തലവൻ ആയ ആണ്ട്രൂ കിംഗ്‌ (Andrew King) ആണ്.

കടിച്ചാൽ പൊട്ടാത്ത വലിയ വലിയ കാര്യങ്ങൾ പ്രതിപാദിക്കുന്ന ഒരു ബോറൻ പുസ്തകത്തിന്റെ ചിത്രമാകാം സ്വാഭാവികമായും വായനക്കാരുടെ മനസ്സിൽ തെളിയുന്നത്. ഈ വിശേഷണങ്ങളെയൊക്കെ അപ്രസക്തമാക്കുന്ന,ഒരു ലോഗരിതം ടേബിൾന്റെ അത്രയും മാത്രം വലുപ്പമുള്ള , കേവലം നൂറ്റന്പതു പേജിൽ താഴെ മാത്രം ഒരു കുഞ്ഞൻ പുസ്തകമാണ്  ഇത് . ലളിതമായ ആഖ്യാന ശൈലിയും അതുവഴി  പ്രതിപാദ്യ വിഷയത്തിനു നല്കുന്ന വ്യക്തതയുമാണ് ഈ പുസ്തകത്തിന്റെ ഏറ്റവും വലിയ മേന്മ .

2014 ഫെബ്രുവരി 6, വ്യാഴാഴ്‌ച

ദി കൈറ്റ് റണ്ണർ (The Kite Runner)

ഭാവനാ സന്പുഷ്ടമായ കഥകൾ വായിക്കുവാൻ രസമായിരിക്കാം എന്നാൽ ഭാവനയോടൊപ്പം അല്പം ചരിത്രവും അനുബന്ധസത്യങ്ങളും കൂട്ടിച്ചേർത്ത്  പറയുന്ന കഥകൾക്ക്  തീവ്രത കൂടും . ആ ഗണത്തിൽപ്പെടുന്ന ഒന്നാണ് ഖാലിദ്‌ ഹുസേനി(Khaled Hosseini)യുടെ ദി കൈറ്റ് റണ്ണർ (The Kite Runner) എന്ന നോവൽ. അമീർ എന്ന അഫ്ഗാൻ ബാലനിലൂടെ പറഞ്ഞു പോകുന്ന കഥയിൽ , അഫ്ഗാനിസ്ഥാൻ -ന്റെ സോവൈറ്റ്‌(Soviet)  അധിനിവേശവും തുടർന്നുള്ള താലിബാൻ -ന്റെ വളർച്ചയും അടക്കും ആ പ്രദേശത്തിന്റെ ഏറ്റവും നിർണ്ണായകവും സംഭവ ബഹുലവുമായ ഒരു കാലഘട്ടവും വന്നു പോകുന്നുണ്ട് . ഒരു അഭയാർത്ഥിയായി അമേരിക്കയിലേക്ക് കുടിയേറിയ ഹുസേനിയുടെ ആത്മകഥാപരമാണോ ഈ നോവൽ എന്ന് വ്യക്തമാക്കിയിട്ടില്ല  എങ്കിലും എഴുത്തിന്റെ ശക്തി യും കഥാഗതിയും വായനക്കാരനെക്കൊണ്ട്  അങ്ങനെ ചിന്തിപ്പിക്കുന്നു.

പഷ്ടാൻ(Pashtun) എന്ന ഉന്നത കുലത്തിൽപ്പെട്ട ബാലനാണ് അമീർ.അമ്മയുടെ ലാളന അനുഭവിക്കാനുള്ള ഭാഗ്യമില്ലായിരുന്നുവെങ്കിലും എല്ലാ ഭൌതിക  സുഖസൗകര്യങ്ങളോടും കൂടിയാണ്  അവൻ വളർന്നത്‌.തിരക്കുള്ള  ഒരു  ബിസിനെസ്സ് കാരനായിരുന്ന അവന്റെ ബാബ , അവനെ സന്തോഷിപ്പിക്കുവാൻ കഴിയുന്നതെല്ലാം ചെയ്യുമായിരുന്നു.വീട്ടിലെ ജോലിക്കാരനായിരുന്ന ഹസൻ ആയിരുന്നു അവന്റെ കളിക്കൂട്ടുകാരൻ.ബാബ യുടെ കളിക്കൂട്ടുകാരനായിരുന്നു ഹസൻന്റെ അച്ഛൻ  അലി, അതായത്  കേവലം മുതലാളി-തൊഴിലാളി ബന്ധത്തിനുപരിയുള്ള  അടുപ്പം അവർ തമ്മിൽ  ഉണ്ടായിരുന്നു. അമീർ -നെ പോലെ ഹസൻ-നും അമ്മയുടെ സ്നേഹ വാത്സല്യങ്ങൾ അനുഭവിക്കുവാൻ ഭാഗ്യം ലഭിച്ചിരുന്നില്ല.


2014 ജനുവരി 28, ചൊവ്വാഴ്ച

ദൃശ്യം സിനിമയ്ക്ക് ആധാരമായ പുസ്‌തകം(The Devotion of Suspect X)

യുക്തി ഭദ്രമായ ഒരു കുടുംബ-കുറ്റാന്വേക്ഷണ ചിത്രം !  മോഹൻലാൽ നായകനായി ! അതും 2014-ൽ ... ഒരിക്കലും ചേർത്തു വയ്ക്കാൻ കഴിയില്ല എന്ന് മനസിലുറപ്പിച്ച ഒട്ടേറെ വിശേഷണങ്ങൾ ഒരുമിച്ച് ചേർത്ത് വച്ചത് പോലെ തോന്നി.മലയാള സിനിമയിലെ എല്ലാ റെക്കോർഡുകളും ഭേദിച്ചു, കണ്ടവർ കണ്ടവർ വീണ്ടും വീണ്ടും കാണുന്ന ഒരു ഒരുഗ്രൻ സിനിമ എന്നാണ്  മാധ്യമങ്ങളിൽ നിന്നും സോഷ്യൽ മീഡിയയിൽ നിന്നും മറ്റും കിട്ടിയ വിവരം.ഇത്തരം സിനിമകളാണ് കേരളത്തിലെ എല്ലാ കുറ്റകൃത്യങ്ങൾക്കും(ഇതുവരെ നടന്നതും ഇനി നടക്കാനിരിക്കുന്നതും )ആധാരം എന്ന പോലീസ് ഏമാൻമാരുടെ കണ്ടെത്തലും കൂടി കേട്ടപ്പോൾ ഉഗ്വേഗം മുൾമുനയിലെത്തി .അങ്ങനെ അന്തം വിട്ടിരിക്കുംപോഴാണ്  ഒരു ജാപ്പനീസ് നോവലും അതിനെ അധികരിച്ച് നിർമ്മിക്കപ്പെട്ട ഒരു ചലച്ചിത്രവുമാണ് ഇതിന്റെ പിന്നിലെന്ന് അറിയുന്നത് . ജിത്തു ജോസഫ്  അത്ര ജീനിയസ് ഒന്നുമല്ല എന്ന് കേട്ടപ്പോൾ എല്ലാ മലയാളികളെയും പോലെ ഒരു ആശ്വാസം തോന്നാതിരുന്നില്ല !
 
ഒരു പുസ്തകത്തെ അധികരിച്ച് ചലച്ചിത്രമെടുക്കുന്പോൾ, അണിയറ പ്രവർത്തകർ നേരിടുന്ന വെല്ലുവിളികൾ പലതാണ് . വായനക്കാരന്റെ അനന്തമായ ഭാവനയിൽ പടുവൃക്ഷമായി പടർന്നു പന്തലിച്ചു  നിൽക്കുന്ന, ഒന്നിനെ ഒരു നിശ്ചിത സമയത്തിനുള്ളിൽ  കുറേക്കൂടി വലിയ ആസ്വാദക വൃന്ദത്തിനു മുന്നിൽ  അവതരിപ്പിക്കുക  എന്നത് അത്ര എളുപ്പമുള്ള പണിയല്ല . അതുകൊണ്ടാണ്  പുസ്തകം വായിച്ചുകഴിഞ്ഞാൽ , അതിനെ അധികരിച്ച് നിർമ്മിക്കുന്ന സിനിമ പലപ്പോഴും നമുക്ക് ഇഷ്ടപ്പെടാതെ പോകുന്നത് . ഈ അനുഭവത്തിന്  ഒരു അപവാദമാണ് ദൃശ്യം  സിനിമ കണ്ടപ്പോൾ തോന്നിയത് .

2013 നവംബർ 19, ചൊവ്വാഴ്ച

ദി ജേർണി ഹോം

ജീവിതത്തിലെ നിയോഗങ്ങൾ നമ്മെ അത്ഭുതപ്പെടുത്താറുണ്ട് ,കാല-ദേശ പരിമിതികൾക്കപ്പുറത്ത് , എന്തു ജാലവിദ്യയും ഒരുക്കുന്ന അവയെക്കുറിച്ച്  ,ആഴത്തിൽ ചിന്തിക്കുവാൻ പ്രേരിപ്പിക്കുന്ന ഒരു പുസ്തകമാണ്  ദി ജേർണി ഹോം(The Journey Home) . ഒറ്റ നോട്ടത്തിൽ അവിശ്വസനീയമായി തോന്നാവുന്ന ഒട്ടേറെ നിയോഗങ്ങളുടെയും നിമിത്തങ്ങളുടെയും കഥ പറയുന്ന ഒരു ആത്മകഥയാണിത് .തികച്ചും വ്യത്യസ്തമായ ജീവിത സാഹചര്യങ്ങളിൽ നിന്ന്  ഒട്ടേറെ പ്രതിബന്ധങ്ങളെ അതിജീവിച്ച്  ഭാരതത്തിൽ എത്തി , അതിന്റെ പാരമ്പര്യവും സംസ്കാരവും മനസിലാക്കുകയും അവയെ ലോകത്തെമ്പാടും പ്രചരിപ്പിക്കുവാൻ ജീവിതം ഒഴിഞ്ഞു  വയ്ക്കുകയും ചെയ്യുന്ന രാധാനാഥ സ്വാമികളാണ്  (Radhanath Swami) തന്റെ പൂർവാശ്രമ അനുഭവങ്ങൾ  വായനക്കാരുമായി പങ്കു വയ്ക്കുന്നത് . ശ്രേഷ്ഠമായ  പൈതൃകങ്ങൾക്ക്  നടുവിൽ ജനിച്ച്  വളർന്നിട്ടും  അവയോട് അവകജ്ഞയും അറിവില്ലായ്മയും വച്ച് പുലർത്തുന്ന നമ്മിൽ പലരെയും സ്വയം വിമർശനത്തിന്  പ്രേരിപ്പിക്കുന്നതുകൂടിയാണ്  ഇതിന്റെ ഉള്ളടക്കം.

അമേരിക്കയിലെ ചിക്കാഗോ നഗരത്തിനു  സമീപമുള്ള ഒരു ചെറു പട്ടണത്തിൽ ജനിച്ച്  വളർന്ന  റിച്ചാർഡ്‌  എന്ന കുട്ടി . ജുയിഷ്  മത വിശ്വാസികൾ ആയ അച്ഛനും അമ്മയും രണ്ടു സഹോദരന്മാരും അടങ്ങുന്ന ഒരു കുടുംബം. റിച്ചി എന്ന വിളിപ്പേരിൽ അറിയപ്പെട്ടിരുന്ന അവൻ സാധാരണ കുട്ടികൾ  കളിച്ചു വളരുന്നത്‌  പോലെ വളർന്നു. ഒരിക്കൽ കളിക്കുന്നതിനിടയിൽ ഒരു കൂട്ടുകാരൻ  പറഞ്ഞ  ചില  വാചകങ്ങൾ   റിച്ചിയുടെ മനസിനെ വല്ലാതെ പിടിച്ചുലച്ചു .  " ക്രിസ്തുവിൽ വിശ്വസിക്കാത്ത നീ , വെറുക്കപ്പെട്ട വിഭാഗത്തിൽപ്പെട്ടവനാണ് . ഈശ്വരനുപോലും നിന്നോടു  വെറുപ്പാണ്  "  തന്റെ വീട്ടിൽ  പറഞ്ഞു കേട്ട വാചകങ്ങൾ  അതേപടി ഉരുവിട്ട അവൻ, കൂടുതൽ ഒന്നും ചിന്തിച്ചിരിക്കില്ല എന്നാൽ  സ്നേഹിക്കാൻ മാത്രം പഠിപ്പിക്കുന്ന ദൈവങ്ങൾ എങ്ങനെ വെറുക്കും എന്ന ചിന്ത റിച്ചിയെ അസ്വസ്ഥനാക്കി . അമ്മയോട്  അവൻ ഈ കാര്യങ്ങൾ പറഞ്ഞുവെങ്കിലും പക്വമതിയായ  അവർ മറ്റു വിഷയങ്ങളിലേക്ക്  അവന്റെ ശ്രദ്ധ തിരിച്ചുവിട്ടു.

2013 ഒക്‌ടോബർ 10, വ്യാഴാഴ്‌ച

പട്ടിണി കിടക്കുന്നവനെ സഹായിക്കാത്ത ദൈവത്തില്‍ ഞാന്‍ വിശ്വസിക്കുന്നില്ല- സ്റ്റീവ് ജോബ്‌സ്‌

പ്രസിദ്ധരായ വ്യക്തികളുടെ സാധാരണ ജീവിതചര്യകളെ കുറിച്ചും ഇഷ്ടാനിഷ്ടങ്ങളെ കുറിച്ചും   അറിയാന്‍ താത്പര്യമില്ലാത്തവര്‍ ഉണ്ടാകുമോ? എന്തായിരുന്നു അവരുടെ ഇഷ്ടപ്പെട്ട ആഹാരം?,ഏതു പാട്ടുകളാണ്  അവര്‍ സ്ഥിരം കേട്ടിരുന്നത് ? , ഏതു പുസ്തകം ആണ്  അവര്‍ വായിച്ചിരുന്നത് ? എന്തായിരിന്നു അവരുടെ ഇഷ്ടപ്പെട്ട വസ്ത്രം   .... അങ്ങനെ നീണ്ടുപോകുന്നു നമ്മുടെ ജിജ്ഞാസ. സ്റ്റീവ് ജോബ്സിന്റെ ജീവിതത്തിലെ , സാധാരണക്കാരായ നമുക്ക്  കൌതുകം തോന്നിപ്പിക്കുന്ന, ചില ഇഷ്ടാനിഷ്ടങ്ങളും സംഭവങ്ങളും അടര്‍ത്തിയെടുത്തു അവതരിപ്പിക്കുകയാണ്  ഇവിടെ. ലേഖനം മുഴുവൻ വായിക്കുവാൻ മാതൃഭൂമി ബുക്സ്  സന്ദർശിക്കുക

2013 ഒക്‌ടോബർ 9, ബുധനാഴ്‌ച

നയൻ പോയിന്റ്‌ സീറോ ആൻഡ്‌ ബിയോണ്ട് (Nine point zero and beyond )

 ഐ ഐ ടി യിൽ നിന്ന്  എൻജിനിയറിംഗ്  ബിരുദം ; അമേരിക്കയിൽ ഉപരിപഠനം ; ഇൻവെസ്റ്റ്‌മെന്റ്  ബാങ്കിംഗ്  മേഖലയിൽ ഉയർന്ന പദവി; ജീവിത വിജയത്തിന്  മറ്റൊന്നും ആവശ്യമില്ല എന്ന് കരുതുന്ന രവിശങ്കർ അയ്യർ എന്ന പാലക്കാടൻ മലയാളിയുടെ കഥ പറയുന്ന നോവൽ  ആണ്  രേഷ്മ ആനന്ദ് -ന്റെ  നയൻ പോയിന്റ്‌  സീറോ ആൻഡ്‌  ബിയോണ്ട് (9 .0 and beyond ). പുസ്തകമായി പ്രസിദ്ധീകരിക്കുന്ന ആദ്യ നോവൽ ആണിതെങ്കിലും , പക്വമതിയായ ഒരു എഴുത്തുകാരിയെയാണ്  നാം ഇതിൽ കാണുന്നത് .ലളിതമായ ഭാഷാ ശൈലിയും  ഇഴച്ചിലോ വലിച്ചു നീട്ടലോ ഇല്ലാത്ത ആഖ്യാന രീതിയും പ്രശംസയർഹിക്കുന്നു . അതുകൊണ്ട് തന്നെ വളരെ എളുപ്പത്തിൽ വായിച്ചു തീർക്കാവുന്ന ഒരു കൃതിയാണിത് .

ഐ ഐ ടി എൻട്രൻസ്‌ പരീക്ഷയുടെ ഫലം പ്രസിദ്ധീകരിക്കുന്ന ദിവസം,പാലക്കാട്ടെ ഒരു സാധാരണ ബ്രാഹ്മണ കുടുംബത്തിൽ അരങ്ങേറുന്ന ഒരു രംഗം വിവരിച്ചു കൊണ്ടാണ്  കഥ തുടങ്ങുന്നത് . എല്ലാവരുടെയും സ്വപ്നങ്ങൾ സാക്ഷാത്കരിച്ചുകൊണ്ട്‌  രവിശങ്കർ  അയ്യർ ഉയർന്ന റാങ്കോടെ പ്രവേശനം നേടുന്നു.ഐ ഐ ടി യിൽ  "സാങ്കി" എന്ന വിളിപ്പേരിൽ അറിയപ്പെടുന്ന രവി , മാറ്റ് (മാത്യു)  , സാറ്റ (സന്തോഷ്‌) തുടങ്ങിയ മറ്റു മലയാളികളുമായി സൌഹൃതത്തിലാകുന്നു  . ഉത്പതിക്ഷ്ണുക്കളായ ഇവർ ഉന്നത പഠനത്തിനു അമേരിക്കയിലേക്ക്  പോകുന്നു.സുഹൃത്തുകൾ എങ്കിലും  സാങ്കി യുടെ ജീവിത വീക്ഷണം മറ്റുള്ളവരിൽ നിന്ന്  തികച്ചും വ്യതസ്തമായിരുന്നു. ജോലിയിൽ ഉന്നത പദവി അലങ്കരിക്കുന്നതും കൂടുതൽ പണം സമ്പാദിക്കുന്നതും  മാത്രമാണ്  ജീവിതവിജയം എന്ന് കരുതിയ  അവൻ വ്യക്തി ബന്ധങ്ങളെ, തന്റെ നേട്ടത്തിന്റെ ചവിട്ടുപടി കൾ ആയി മാത്രം കാണുന്നു .  നേട്ടങ്ങൾ ഉണ്ടാകുന്ന മുറയ്ക്ക്  അവൻ വന്ന വഴികൾ മറക്കുന്നു .

2013 ഒക്‌ടോബർ 4, വെള്ളിയാഴ്‌ച

പർവതങ്ങളിലെ പ്രതിധ്വനി........

"അപ്പോൾ  നിങ്ങള്‍ക്ക്  ഒരു കഥ കേൾക്കണം..... പക്ഷെ  കഥ പറഞ്ഞു തുടങ്ങിയാല്‍ ചോദ്യങ്ങള്‍ ചോദിച്ച്  ശല്യപ്പെടുത്തരുത്; ഒന്ന് കൂടി, ഒന്ന്  കൂടി  എന്ന് പറഞ്ഞു  വാശിയും  അരുത് ". ഉറങ്ങാന്‍ കിടക്കുന്ന പത്തു വയസുകാരന്‍ അബ്ധുള്ളയോടും അനുജത്തി പരിയോടും അച്ഛന്‍ ചട്ടം കെട്ടുകയാണ്. "നാളെ ഞാനും പരിയും കൂടി നടത്തുന്ന ദീർഘയാത്ര സുഖകരമാകണമെങ്കിൽ  ഇന്ന് നന്നായി ഉറങ്ങിയേ തീരൂ. അതുപോലെ, മോനേ അബ്ദുേളള,  ഒരു കാര്യം കൂടി, ഞങ്ങൾ അടുത്തില്ലാത്ത സമയത്ത്, അമ്മയെ അനുസരിച്ച് നീ നല്ല കുട്ടിയായി ഇരിക്കുകയും വേണം".

'ദി കൈറ്റ്  റണ്ണർ ' എന്ന  ഒറ്റ നോവലിലൂടെ ലോക ശ്രദ്ധ ആകർഷിച്ച എഴുത്തുകാരനായ  ഖാലിദ്‌  ഹോസ്സേനി (Khaled Hosseini) യുടെ  ഏറ്റവും പുതിയ നോവൽ  ആണ്  'ആൻഡ്‌  മൌണ്ടൻസ്  എന്ഖോഡ് ' (And the mountains echoed). സങ്കീർണ്ണമായ മനുഷ്യ ബന്ധങ്ങളുടെ കഥ പറയുന്നതിൽ സമർഥനായ ഹോസ്സേനി, ഇക്കുറി  ദേശ-കാല   സമസ്യകൾ  കൂടി  മനോഹരമായി സന്നിവേശിപ്പിച്ചിരിക്കുന്നു . അങ്ങ്  കിഴക്ക്  കാബുൾ മുതൽ ഇങ്ങ്  പടിഞ്ഞാറൻ കാലിഫോർണിയ തീരങ്ങൾ   വരെ പരന്നു  കിടക്കുന്ന വിവിധ ദേശങ്ങളിൽ , 1947 മുതൽ 2010 വരെയുള്ള  അഞ്ചു പതിറ്റാണ്ട്നു മുകളിൽ പടർന്നു കിടക്കുന്ന  ഒരു പറ്റം  ജീവിതങ്ങളുടെ കഥയാണിത്. ശബ്ദ വീചികൾ , മലനിരകളിൽ തട്ടി പ്രധിധ്വനിയുണ്ടാക്കുന്നത്  പോലെയാണ്  , ജീവിതത്തിൽ ഒരുവൻ എടുക്കുന്ന തീരുമാനങ്ങളും എന്ന ഹുസ്സെനിയി യുടെ നിരീക്ഷണത്തോട്‌  ഈ കഥ  പൂര്ണമായും നീതി പുലർത്തുന്നുണ്ട് .അനേക അദ്ധ്യായങ്ങളായി , ഹോസ്സേനി വായനക്കാർക്ക്  വിളമ്പുന്ന , സമൃദ്ധമായ വിരുന്നിന്ന്റെ  ആദ്യ അദ്ധ്യായത്തിന്റെ  പരിഭാഷ  വായിക്കുവാൻ  മാതൃഭൂമി ബുക്സ് ന്റെ ഫിക്ഷൻ പേജ് സന്ദർശിക്കുക 

                            

2013 മേയ് 12, ഞായറാഴ്‌ച

കെ .രേഖ യുടെ "പ്രകാശ്‌ രാജും ഞാനും"

"പെയ്തൊഴിയാത്ത ഓർമ്മകൾ മനസ്സിനെന്നും ജീവനാണ് .വർഷങ്ങൾ പലതു കഴിഞ്ഞിട്ടും മങ്ങാതെ തെളിഞ്ഞു കത്തുന്ന  ഒരു പിടി ഓർമകളെ  മനസിൽ നിന്ന് പുറത്തെടുക്കുകയാണ്  ഈ പുസ്തകത്തിൽ രേഖ ചെയ്യത്" . പുസ്തകത്തിന്റെ പുറം ചട്ടയിലെ ഈ വാചകങ്ങൾ ആണ് കെ .രേഖ യുടെ  "പ്രകാശ്‌ രാജും ഞാനും" എന്ന കുറിപ്പുകളുടെ  സമാഹാരത്തെ വളരെ ചെറിയ ഒരു അവധി കഴിഞ്ഞുള്ള മടക്ക യാത്രയിൽ വായനയ്ക്കെടുക്കാൻ എന്നെ പ്രേരിപ്പിച്ചത് . എഴുപതു പേജുകൾ മാത്രമുള്ള വളരെ ചെറിയ ഈ പുസ്തകം കണക്കു കൂട്ടലുകൾ തെറ്റിച്ചില്ല. ലളിതമായ വിഷയങ്ങളും സരസ്സമായ എഴുത്തും , യാത്രാക്ഷീണവും മറ്റും കൊണ്ട് അസ്വസ്ഥമായിയിരുന്ന മനസിനെ വേണ്ട രീതിയിൽ തന്നെ പരിപാലിച്ചു എന്നു തന്നെ വേണം പറയാൻ. മലയാളത്തിൽ നിന്ന്  അന്യമായിക്കൊണ്ടിരിക്കുന്നു എന്ന്  നിരൂപകർ  പരാതി പ്പെടുന്ന ,  "നേരം പോക്ക് "  വായനയ്ക്ക്  രേഖ യുടെ പുസ്തകങ്ങൾ കണ്ണടച്ച്  തിരഞ്ഞെടുക്കാം എന്ന്  ഒരിക്കൽ കൂടി തെളിയിച്ചിരിക്കുന്നു.

നമ്മുടെ ഹൃദയത്തോട്  അടുത്തുനിൽക്കുന്ന,വൈവിധ്യമായ വിഷയങ്ങളെ  ആസ്പദമാക്കിയുള്ള ഈ കുറിപ്പുകൾ  ആത്മകഥാംശമുള്ളവയാണ് . എഴുത്തുകാരിയുടെ മനോവ്യാപാരങ്ങളുടെ ഭേദപ്പെട്ട ഒരു  ചിത്രം വരയ്ക്കാൻ ഇവയ്ക്ക്  കഴിഞ്ഞിട്ടുമുണ്ട്.ഇങ്ങനെ രൂപപ്പെടുന്ന ചിത്രം ഒരു ശരാശരി വായനക്കാരന്റെ മനോവ്യാപാരത്തോട്  വളരെ അടുത്ത്  നില്ക്കുന്ന ഒന്നാണ്  എന്നതിന്നാൽ രേഖ യെ തങ്ങളിൽ ഒരാളായി കാണാൻ വായനക്കാരന് എളുപ്പം സാധിക്കുന്നു . ഇത് വായനയുടെ ആസ്വാദ്യതയിൽ ചെലുത്തുന്ന സ്വാധീനം ചെറുതല്ല . ജീവിതത്തിന്റെ  പല ഘട്ടങ്ങളിൽ നാം പരിചയപ്പെടുന്ന വിവിധ തരം ബന്ധങ്ങളും അവയിൽ ഇണ പിഴിയാതെ കിടക്കുന്ന പ്രണയവും സ്നേഹവും നൊന്പരങ്ങളും മറ്റുംമാണ്  , വളരെ ചുരുക്കിപ്പറഞ്ഞാൽ  , ഇവയുടെ ഇതി വൃത്തം .

2013 ഏപ്രിൽ 5, വെള്ളിയാഴ്‌ച

ഫാറ്റ് ചാൻസ്

ഇന്ന്  നാം നേരിടുന്ന    'വൈറ്റ്  കോളർ' (white collar) വിപത്തുകളിൽ  ഏറ്റവും  പ്രധാനപപെട്ട  ഒന്നാണ്  അൽപ ജ്ഞാനവും, അതിൽ മുറുകെ പിടിച്ച്, സാമാന്യ ബുദ്ധിയെപ്പോലും തിരസ്കരിച്ചുള്ള  ആധുനീക സമൂഹത്തിന്റെ  ചെയ്തികളും.അതീവ ശ്രദ്ധയോടും കരുതലോടും ഇടപെടലുകൾ നടത്തേണ്ടുന്ന  ആരോഗ്യ രംഗത്താണ്  ഇത്തരം  പ്രവണതകൾ  കൂടി വരുന്നത്  എന്നത്  നമ്മെ വീണ്ടും വിഷമ വൃത്തത്തിലാക്കുന്നു. ഇത്തരത്തിൽ നാം ചിന്തിക്കാതെ പോകുന്ന ആരോഗ്യ പ്രശ്നങ്ങളിലേക്ക്   നമ്മുടെ  ശ്രദ്ധ തിരിക്കുന്ന ഒരു പുസ്തകം ആണ്  ഡോക്ടർ ലസ്റ്റിഗി ന്റെ (Robert Lustig) ഫാറ്റ്  ചാൻസ് (Fat Chance: Beating the Odds against Sugar, Processed Food, Obesity, and Disease) .മെഡിക്കൽ രംഗത്ത്‌  പ്രവർത്തിക്കുന്നവർക്കും സാധാരണ വായനക്കാർക്കും  ഒരു പോലെ  മനസിലാകത്തക്ക  വിധത്തിൽ  അവതരിപ്പിച്ചിരിക്കുന്ന ഇത് ,  നല്ല  ജീവനത്തിനുള്ള  ഒരു   'സെല്ഫ്  ഹെല്പ്  ബുക്ക്‌ ' കൂടിയാണ്.
ലോകത്തെ ആകെ ബാധിച്ചിരിക്കുന്ന, അതിവേഗം പടർന്നു പിടിച്ചു കൊണ്ടിരിക്കുന്ന , പൊണ്ണത്തടി (Obesity) എന്ന മഹാവ്യാധിയുടെ ആരോഗ്യപരവും സാമൂഹികവുമായ കാരണങ്ങൾ  പറഞ്ഞു കൊണ്ടാണ്  പുസ്തകം തുടങ്ങുന്നത്.തികച്ചും സാധാരണ  ജനങ്ങളുടെ കാഴ്ചയിലൂടെ  വികസിക്കുന്ന ഈ പുസ്തകം ലളിത മായ ഭാഷ കൊണ്ട്  കൂടുതൽ  വായനാ യോഗ്യമാകുന്നു.  " ഗവേഷണങ്ങളിൽ  കാലാ കാലങ്ങളിൽ മാറ്റം വരുന്നു  , ഓരോ കാലഘട്ടത്തിലും കരുതപ്പെട്ടിരുന്ന  അടിസ്ഥാന കാരണങ്ങൾ അപ്പാടെ മാറി മറിയുകയും പുതിയ കാരണങ്ങൾ  കണ്ടെത്തപ്പെടുകയും ചെയ്യുന്നു.എന്നാൽ ഈ 'മാറ്റ'ങ്ങളെ  ശാസ്ത്രത്തിന്റെ  ഒരു  അടിസ്ഥാന സ്വഭാവമായി  മനസിലാക്കാതെ  'കാള  പെറ്റെന്നു  കേൾക്കുമ്പോൾ  കയറെടുക്കുന്ന  പോലെ' അടിക്കടി ഉണ്ടാകുന്ന  ഈ മാറ്റങ്ങൾക്ക്  അനുസൃതമായി  ജനങ്ങളുടെ ജീവിതചര്യയെയും ചിന്താധാരയും മാറുന്നു എന്നത്  ഗുരുതരമായ പ്രത്യാഘാതമാണ് ആരോഗ്യ രംഗത്ത്‌  സൃഷ്ടിക്കുന്നത് " - .പുസ്തകം പറയുന്നു.

2013 മാർച്ച് 5, ചൊവ്വാഴ്ച

മണി രത്നവുമായി അല്പനേരം.....

 പ്രശസ്ത സംവിധായകനായ മണി രത്നത്തെയും അദ്ദേഹത്തിന്റെ സിനിമകളെയും കൂടുതല്‍ അടുത്തറിയാന്‍ സഹായിക്കുന്ന ഒരു പുസ്തകമാണ്  'കോണ്‍വേര്‍സേഷന്‍സ്  വിത്ത്‌  മണിരത്നം'.(Conversations with Mani Ratnam) 
പ്രശസ്ത  ചലച്ചിത്ര നിരൂപകന്‍, ഭരദ്വാജ്  രംഗന്‍ (Baradwaj Rangan)നടത്തുന്ന  അഭിമുഖ സംഭാഷണങ്ങളുടെ  ഒരു സമാഹാരമാണ്  ഇത് . മണിരത്നത്തിന്റെ  എല്ലാ  സിനിമകളും കണ്ടിരിക്കണമെന്നോ  ,ചലച്ചിത്ര നിരൂപണ ശൈലി  നന്നായി  അറിഞ്ഞിരിക്കണമെന്നോ ഉള്ള  ഒരു  ഒരു യോഗ്യതയും ഈ പുസ്തകം ആസ്വദിക്കാന്‍ വായനക്കാരന് ആവശ്യമില്ല .  മണി രത്നത്തിന്റെ ഓരോ സിനിമയുടെയും ഒരു സംക്ഷിപ്ത രൂപത്തോടെ ആരംഭിക്കുന്ന ഓരോ അദ്ധ്യായവും  അതിലെ തിരക്കഥയെക്കുറിച്ചും  പാത്ര സൃഷ്ടിയെക്കുറിച്ചും, പാട്ടുകളെകുറിച്ചും  മറ്റും മറ്റും വളരെ സൂക്ഷമായ തലത്തിലേക്ക്  ആഴ്‌നിറങ്ങുന്നു . സിനിമയെകുറിച്ച് നല്ല പരിക്ഞ്ഞാന മുള്ള  ഗ്രന്ഥകാരന്‍ , വളരെ പ്രസക്തമായ ചോദ്യങ്ങള്‍ ചോദിക്കുന്നു എന്ന് മാത്രമല്ല , മണിരത്നത്തില്‍ നിന്ന് വളരെ ലോജിക്കലും സമ്പൂര്‍ണവും ആയ  ഉത്തരങ്ങള്‍ പുറത്ത് കൊണ്ട് വരുകയും ചെയ്യുന്നു . ആരുടേയും ഈഗോയില്‍ കുടുങ്ങാതെ, ചോദിക്കേണ്ടുന്ന ചോദ്യങ്ങള്‍ ധൈര്യമായി ചോദിച്ചും , ഉത്തരങ്ങള്‍ തൃപ്തികരങ്ങളല്ലെങ്കില്‍  അവ വീണ്ടും ഉന്നയിച്ചും  മുന്നോട്ടു പോകുന്ന  സംവാദങ്ങള്‍ ഒരേ സമയം ഗൌരവതരവും രസകരവും ആണ് .  അഥിതിയെ ഭയ-ഭക്തി-ബഹുമാനങ്ങളോട്  സമീപിച്ച് , പറയുന്നതെന്തും തൊണ്ട തൊടാതെ വിഴുങ്ങി , ശരിവയ്ക്കുന്ന , പതിവ്  അഭിമുഖ സംഭാഷണ ങ്ങളില്‍ നിന്ന്  ഇതിനെ വ്യത്യസ്തമാക്കുന്നതും  ഇതാണ് .


2013 ഫെബ്രുവരി 11, തിങ്കളാഴ്‌ച

'നോ ഈസി ഡേ'

തീവ്രവാദത്തിനെതിരെ അമേരിക്ക നടത്തുന്ന യുദ്ധത്തിലെ  ഏറ്റവും സുവര്‍ണ്ണ മുഹൂര്‍ത്തമാണ്  ഒസാമ ബിന്‍ ലാദന്റെ വധം.അമേരിക്കന്‍ സൈന്യത്തിന്റെ എല്ലാ വിഭാഗങ്ങളും ഒത്തൊരുമയോടെ നീണ്ട പത്തുവര്‍ഷക്കാലം നടത്തിയ അക്ഷീണ  പരിശ്രമത്തിന്റെ പരിണിത ഫലമാണിതെന്ന്  പറയുമ്പോള്‍ തന്നെ അതിന്റെ പ്രാധാന്യവും വിജയത്തില്‍ അവര്‍ക്കുള്ള സന്തോഷവും നമുക്ക്  മനസിലാകും. തന്ത്രശാലിയും ബുദ്ധിമാനുമായ  ലാദനെ അടിയറവു പറയിച്ച മിഷന്റെ വിവരണം അടങ്ങിയ 'നോ ഈസി ഡേ' (No Easy Day)എന്ന പുസ്തകം ഇത്രയേറെ ജനശ്രദ്ധ പിടിച്ചു പറ്റിയതിന്  മറ്റു കാരണങ്ങള്‍ അന്വേക്ഷിച്ച്‌  പോകേണ്ടുന്ന കാര്യമില്ല . മാര്‍ക്ക്‌  ഓവെന്‍(Mark Owen) എന്ന വിളിപ്പേരില്‍(Pseudonym) പുസ്തകം എഴുതിയ മുന്‍ നേവി സീല്‍ അംഗം ലാദനെ വധിച്ച മിഷനിലെ മുഖ്യനായിരുന്നു. ഉദ്വേഗം നിറഞ്ഞ മിഷന്‍ വിശേഷങ്ങള്‍ അതെപടി വായനക്കാരില്‍ എത്തിക്കുന്നതിനുപരി, സീല്‍ ട്രെയിനിംഗ് വിശേഷ ങ്ങളും അല്പസ്വല്പം കുടുംബവിശേഷങ്ങളും  മറ്റും മറ്റുമായി  ഇതിന്റെ വായന രസകരമാക്കുന്നു .

 സീല്‍ ടീം സിക്സ് (Navy SEAL Team Six) എന്ന എലീറ്റ് (Elite)ഗണത്തില്‍ എത്തിപ്പെടുവാന്‍ മറ്റു സീല്‍ അംഗങ്ങള്‍ നടത്തുന്ന പരിശ്രമങ്ങളും ,ടീം സിക്സ് -ല്‍ എത്തിക്കഴിഞ്ഞാല്‍ അവര്‍ കടന്നു പോകുന്ന കഠിനമായ പരിശീലന കഥകളും ഒക്കെ, ഈ ഗണത്തില്‍ പെട്ട  മറ്റു പുസ്തകങ്ങള്‍ക്ക്  സമാനമാണ് .വളരെ കാര്യമാത്ര പ്രസക്തമായി പറഞ്ഞു പോകുന്ന ഇവ, പലരൂപത്തില്‍ പല തവണ കേട്ട് മടുത്തതാണെങ്കിലും നമ്മെ ബോറടിപ്പിക്കുന്നില്ല.സുരക്ഷയെ മുന്‍ നിര്‍ത്തി വ്യക്തികളുടെ പേരും സംഭവങ്ങള്‍ നടക്കുന്ന സ്ഥലങ്ങളും ഒക്കെ മാറ്റി മറിച്ചിട്ടുണ്ട് എന്ന്  ആമുഖത്തില്‍ വായിച്ചതുകൊണ്ടാകം,അലാസ്കയിലെ (Alaska)ഓവന്റെ കുടുംബ പാശ്ചാത്തലവും ബാല്യ കാല സംഭവങ്ങളും ഒക്കെ വിവരിക്കുന്ന ഭാഗത്തിനോട്, ഒരു വൈകാരികമായ താത്പര്യവും തോന്നാതിരുന്നത്.

2013 ജനുവരി 20, ഞായറാഴ്‌ച

ദി ഡിസ്കവറീസ്

ഇരുപതാം നൂറാണ്ടില്‍ ശാസ്ത്രത്തിന്റെ ഗതി തിരിച്ചുവിട്ട ഒരുകൂട്ടം കണ്ടുപിടുത്തങ്ങളെ കുറിച്ച് വിവരിക്കുന്ന ഒരു പുസ്തകമാണ്  അലെന്‍ ലൈറ്റ്മാന്‍ (Alan Lightman) -ന്റെ ദി ഡിസ്കവറീസ് : ഗ്രേറ്റ്‌  ബ്രേക്ക്‌ ത്രൂസ്  ഓഫ്  20th സെഞ്ച്വറി സയന്‍സ് (The Discoveries:Great Breakthroughs in 20th Century). ശാസ്ത്രം എന്ന അനന്ത വിഹായസ്സില്‍ ,നക്ഷത്രങ്ങളായി തിളങ്ങുന്ന ഓരോ കണ്ടുപിടുത്തങ്ങളുടെയും സ്ഥാനവും ,മറ്റുള്ളവയുമായുള്ള ആപേക്ഷിക പ്രാധാന്യവും വരച്ചു കാട്ടണമെങ്കില്‍ , ശാസ്ത്രത്തിലും ,എഴുത്തിലും,സാംസ്കാരിക ചരിത്രത്തിലും മറ്റും  അതീവ താല്‍പര്യവും പാണ്‍ഡിത്യവുമുള്ള  ഒരാള്‍ക്ക്‌ മാത്രമേ  കഴിയൂ.ഇതിനുപരി ഈ കണ്ടുപിടുത്തങ്ങങ്ങളെ ശാസ്ത്ര ലോകത്തിനു മുന്നില്‍ അവതരിപ്പിച്ച യഥാര്‍ത്ഥ ജേര്‍ണല്‍ പേപ്പറുകളും,അവ സാധാരണ വായനക്കാര്‍ക്ക്   മനസിലാക്കാന്‍ വേണ്ട അടിസ്ഥാന വിക്ഞാന പശ്ചാത്തലം കൂടി  നല്‍കുന്നു വെന്നത് ,  ഈ ഗണത്തില്‍ പെട്ട മറ്റു പുസ്തകങ്ങളില്‍  നിന്ന് ഇതിനെ വ്യത്യസ്തമാക്കുന്നു.

എങ്ങനെയാണ്  മഹത്തായ ഒരു കണ്ടുപിടുത്തത്തില്‍ ഒരു ശാസ്തകാരന്‍ എത്തിച്ചേരുന്നത് ? ആ സമയത്ത്  അദ്ദേഹത്തിന്റെ മാനസീക വ്യാപാരങ്ങള്‍ എന്തെല്ലാമായിരുന്നു? തന്റെ കണ്ടെത്തലിന്റെ 'വലുപ്പം' അദ്ദേഹത്തിന്  എത്രത്തോളം അറിയാമായിരുന്നു ? പ്രഗല്‍ഭനായ ഒരു ശാസ്ത്ര കാരനിലെ 'വ്യക്തി' ഇപ്രകാരമുള്ള ഒരുവനായിരുന്നു ? ഇതര മഹാരഥന്‍ മാരുമായി അവന്‍ എപ്രകാരംതാരതമ്യ പ്പെടുത്തിയിരുന്നു ? തുടങ്ങി സധാരണ പാഠപുസ്തകങ്ങളില്‍ നിന്ന്  നമുക്ക്  ലഭിക്കാത്ത ഒരു ഡയമെന്‍ഷന്‍ ആണ്  ഇതിന്റെ വായനയിലൂടെ നമുക്ക്  ലഭിക്കുന്നത് .കണ്ടുപിടുത്തങ്ങളെ  സാംശീകരിക്കുന്നതില്‍  ,ശാസ്ത്രകാരനെ  പോലെ, ഓരോ ശാസ്തമേഖലയും അനുവര്‍ത്തിക്കുന്ന വ്യത്യസ്തങ്ങളായ സങ്കേതങ്ങളെകൂടി  സൂക്ഷ്മമായി നിരീക്ഷണ വിധേയമാക്കുമ്പോള്‍ ഇത്  കണ്ടുപിടുത്തങ്ങളെ കുറിച്ചുള്ള ഒരു 'കണ്ടുപിടുത്ത'മായി മാറുന്നു .