പ്രശസ്ത സംവിധായകനായ മണി രത്നത്തെയും അദ്ദേഹത്തിന്റെ സിനിമകളെയും കൂടുതല്‍ അടുത്തറിയാന്‍ സഹായിക്കുന്ന ഒരു പുസ്തകമാണ് 'കോണ്‍വേര്‍സേഷന്‍സ് വിത്ത്‌ മണിരത്നം'.(Conversations with Mani Ratnam) പ്രശസ്ത ചലച്ചിത്ര നിരൂപകന്‍, ഭരദ്വാജ് രംഗന്‍ (Baradwaj Rangan)നടത്തുന്ന അഭിമുഖ സംഭാഷണങ്ങളുടെ ഒരു സമാഹാരമാണ് ഇത് . മണിരത്നത്തിന്റെ എല്ലാ സിനിമകളും കണ്ടിരിക്കണമെന്നോ ,ചലച്ചിത്ര നിരൂപണ ശൈലി നന്നായി അറിഞ്ഞിരിക്കണമെന്നോ ഉള്ള ഒരു ഒരു യോഗ്യതയും ഈ പുസ്തകം ആസ്വദിക്കാന്‍ വായനക്കാരന് ആവശ്യമില്ല . മണി രത്നത്തിന്റെ ഓരോ സിനിമയുടെയും ഒരു സംക്ഷിപ്ത രൂപത്തോടെ ആരംഭിക്കുന്ന ഓരോ അദ്ധ്യായവും അതിലെ തിരക്കഥയെക്കുറിച്ചും പാത്ര സൃഷ്ടിയെക്കുറിച്ചും, പാട്ടുകളെകുറിച്ചും മറ്റും മറ്റും വളരെ സൂക്ഷമായ തലത്തിലേക്ക് ആഴ്‌നിറങ്ങുന്നു . സിനിമയെകുറിച്ച് നല്ല പരിക്ഞ്ഞാന മുള്ള ഗ്രന്ഥകാരന്‍ , വളരെ പ്രസക്തമായ ചോദ്യങ്ങള്‍ ചോദിക്കുന്നു എന്ന് മാത്രമല്ല , മണിരത്നത്തില്‍ നിന്ന് വളരെ ലോജിക്കലും സമ്പൂര്‍ണവും ആയ ഉത്തരങ്ങള്‍ പുറത്ത് കൊണ്ട് വരുകയും ചെയ്യുന്നു . ആരുടേയും ഈഗോയില്‍ കുടുങ്ങാതെ, ചോദിക്കേണ്ടുന്ന ചോദ്യങ്ങള്‍ ധൈര്യമായി ചോദിച്ചും , ഉത്തരങ്ങള്‍ തൃപ്തികരങ്ങളല്ലെങ്കില്‍ അവ വീണ്ടും ഉന്നയിച്ചും മുന്നോട്ടു പോകുന്ന സംവാദങ്ങള്‍ ഒരേ സമയം ഗൌരവതരവും രസകരവും ആണ് . അഥിതിയെ ഭയ-ഭക്തി-ബഹുമാനങ്ങളോട് സമീപിച്ച് , പറയുന്നതെന്തും തൊണ്ട തൊടാതെ വിഴുങ്ങി , ശരിവയ്ക്കുന്ന , പതിവ് അഭിമുഖ സംഭാഷണ ങ്ങളില്‍ നിന്ന് ഇതിനെ വ്യത്യസ്തമാക്കുന്നതും ഇതാണ് .
'റോജയും' 'ദില്‍ സെ' യും 'നായകന്‍ ' ഉം പോലെ സൂപ്പര്‍ ഹിറ്റുകളായ സിനിമകള്‍ മുതല്‍ ബോക്സ് ഓഫീസില്‍ പരാജയപ്പെട്ട 'ഇരുവര്‍' ഉം 'രാവണ്‍' ഉം പോലെ വളരെ വ്യത്യസ്തമായ സിനിമകളിലൂടെ, സംവിധായകനുമൊപ്പമുള്ള യാത്ര വളരെ രസകരമായി അനുഭവപ്പെട്ടു . ചില സീനുകളെ ക്യാമറ ആംഗിളിനെക്കുറിച്ചും ഗാനരംഗങ്ങളിലെ സീക്സ്വന്‍സിനെകുറിച്ചുമുള്ള ചര്‍ച്ചകള്‍ ഓരോ സിനിമയുടെയും അണിയറയില്‍ ചൊരിയപ്പെടുന്ന വിയര്‍പ്പിനെകുറിച്ച് നമ്മെ ഇരുത്തി ചിന്തിപ്പിക്കുന്നു . തമിഴിനു പുറമേ ,ഹിന്ദിയും കന്നഡയും മലയാളത്തിലും ഒക്കെ സിനിമ ഒരുക്കുന്ന മണിരത്നത്തിന് ഈ ഭാഷകള്‍ ഒന്നും നന്നായി അറിയില്ലെനും , പ്രതേകിച്ചും ആദ്യകാലങ്ങളില്‍ ഇംഗ്ലീഷ് -ല്‍ ആണ് തിരകഥകള്‍ എഴുതിയിരുന്നതെന്നും വായിച്ചത് അവിശ്വസനീയ മായി ത്തോന്നി .MBA പഠനത്തിനു ശേഷം കേവലം ഒരു ബിസിനസ്‌ എക്സിക്യുട്ടിവ് ആയി മാറേണ്ട മണിരത്നം എങ്ങനെ 'വ്യക്തി മുദ്രയുള്ള' ഒരു സംവിധായകനായിമാറി എന്നും, ഈ സംഭാഷണ ശകലങ്ങള്‍ നമ്മോടു പറയുന്നു .
മണി രത്നം എന്ന ചലച്ചിത്രകാരന്‍ വളരെ സത്യസന്ധമായാണ് ഈ അഭിമുഖത്തില്‍ സംവദി ച്ചിരിക്കുന്നത്‌ എന്ന് പല ഭാഗങ്ങളിലും നമുക്ക് കാണാന്‍ കഴിയും. ഓരോ സിനിമയില്‍ നിന്നും അടുത്തതിലേക്കുള്ള യാത്രയും , അതില്‍ നടീ -നടന്മാര്‍ക്കും ,ക്യാമറമാനും സംഗീത സംവിധായകനും ഉള്‍പെടെ മറ്റ് അണിയറ പ്രവര്‍ത്തകര്‍ക്കും വേണ്ടിയുള്ള 'തിരഞ്ഞെടുക്കല്‍ 'പ്രക്രീയയും അദ്ദേഹം ഇതില്‍ വിവരിക്കുന്നുണ്ട് . നല്ല സിനിമ ഉണ്ടാകണം എന്ന അതിയായ ആഗ്രഹവും ,എല്ലാ കലാകാരന്മാരുടെയും കഴിവുകളെ അംഗീകരിക്കാനും അവരുമായി സഹകരിക്കാനും ഉള്ള ഒരു മനസ്സുമാണ് തന്റെ വിജയത്തിനു നിദാനമെന്നു എന്ന് പല ഘട്ടങ്ങളിലും, വരികള്‍ക്കിടയിലൂടെ അദ്ദേഹം പറഞ്ഞു പോകുന്നുണ്ട് . ബോക്സ് ഓഫീസില്‍ ഏറെ ചര്‍ച്ചാവിഷയമായ , രാവണ്‍ എന്ന സിനിമയിലെ അഭിഷേക് ബച്ചന്റെ അമിതാഭിനയത്തെക്കുറിച്ചുള്ള ചോദ്യത്തില്‍ , തനിക്ക് അങ്ങനെ തോന്നിയിട്ടില്ല എന്നും , ആസ്വാദകര്‍ക്ക് അങ്ങനെ തോന്നിയെങ്കില്‍ അതിന്റെ ഉത്തരവാദിത്വം സംവിധായകനായ തനിക്കാണെന്നും പറയുന്നത് , വളരെ പ്രശംസനീയമാണെന്ന് തോന്നി .
സിനിമയിലെ സംഗീതത്തെ കുറിച്ചും , മാനുഷീക ബന്ധങ്ങളെ വരച്ചുകാട്ടുന്നതില്‍ അവലംബിക്കുന്ന സൂക്ഷതയയെക്കുറിച്ചും മണി രത്നം ഇതില്‍ വാചാലനാകുന്നുണ്ട് . ചലച്ചിത്ര മൊഴിമാറ്റത്തിന്റെ പരിമിതികളെ കുറിച്ചും അതിന്റെ പിന്നിലെ സാമ്പത്തിക ശാസ്ത്രത്തെക്കുറിച്ചും അദ്ദേഹം തുറന്നു സംസാരിക്കുന്നു. ചലച്ചിത്ര ആസ്വാദന രംഗത്ത്‌ വന്ന കാതലായ മാറ്റങ്ങളെകുറിച്ചും , സാങ്കേതികരംഗത്ത് വന്ന ചലനങ്ങളെകുറിച്ചും ഇതിലെ പല അധ്യായങ്ങളും വിശദമായ ചര്‍ച്ചക്കെടുക്കുന്നു. ചുരുക്കത്തില്‍, ഒട്ടും മടുപ്പില്ലാതെ വായിച്ചു പോകുവാന്‍ പറ്റിയ ഒരു പുസ്തകമാണിത് .
വെള്ളിത്തിരയില്‍ ചലിക്കുന്നതെന്തും സിനിമയും , അതിലുള്ള വരെല്ലാം സൂപ്പര്‍സ്റ്റാറുകളും , കാണിക്കുന്ന തോന്യാസങ്ങളെല്ലാം ആവിഷ്കാര സ്വാതന്ത്ര്യവുമായി മാറുന്ന ഈ കാലത്ത് , ഇത്തരം സംവാദങ്ങള്‍ കൂതുതല്‍ പ്രസക്തമാകുന്നു എന്ന് പറയാതെ വയ്യ .
പിന്കുറിപ്പ് : ഈ പുസ്തകം ഒറ്റയടിക്ക് വായിച്ചു തീര്‍ക്കാതെ , എല്ലാ സിനിമകളും ഒരു തവണ എങ്കിലും ഒന്ന് കണ്ടത്തിനു ശേഷം ഇത് വായന പൂര്‍ത്തിയാക്കുകയാണെകില്‍ ആസ്വാദനം പതിന്‍ മടങ്ങ് വര്‍ധിക്കും എന്നതില്‍ സംശയമില്ല .സിനിമയെ ആത്മാര്‍ത്ഥമായി സ്നേഹിക്കുന്നവര്‍ അങ്ങനെ ചെയ്യണം എന്നാണ് എന്റെ നിര്‍ദേശം .
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ